Neste módulo, impártense os principios da animación a través de diferentes técnicas: desde as consideradas máis clásicas, como o "stop motion" e "pixilación", ata as que empregan medios dixitais 2D e 3D.
As bases desta aprendizaxe están no dominio da linguaxe narrativa audiovisual, que permite contar historias, e en habilidades técnicas máis específicas como temporizar (ambas clave para que o espectador entenda e se emocione co resultado).
Para chegar ao obxectivo final, faise necesaria a observación do comportamento dos corpos para controlar os seus movementos e entender as súas reaccións físicas. Con tal propósito, faise necesario que o alumno estableza a relación coas ferramentas técnicas, en función do medio no que se traballe, para que lle permitan realizar un traballo de calidade como animador.
Sería conveniente dispoñer dun equipo en casa co que estudar e completar tarefas.
Non é necesario nin imprescindible, pero recoméndase ter coñecementos de interpretación para coñecer como se move cada parte do noso corpo e poder plasmalo nos diferentes produtos que se realicen. Neste sentido, os coñecementos anatómicos poden ser de axuda.